હવામાન વિભાગની આગાહી
પૂર્વ-મધ્ય અરબી સમુદ્ર પરનું ડીપ પ્રેશર એરિયા હવે ચક્રવાતી તોફાન 'બિપરજોય'માં ફેરવાઈ ગયું છે. ભારતીય હવામાન વિભાગે મંગળવારે એક ચેતવણી જારી કરીને માછીમારોને તેનાથી પ્રભાવિત થઈ શકે તેવા વિસ્તારોમાં જવાનું સાહસ ન કરવા જણાવ્યું હતું.
IMD એ આ સંબંધમાં એક બુલેટિન જારી કરીને કહ્યું હતું કે, 'દક્ષિણ-પૂર્વ અને તેની નજીકના પૂર્વ-મધ્ય અરબી સમુદ્ર પરનો ઊંડો દબાણ વિસ્તાર ચાર કિલોમીટર પ્રતિ કલાકની ઝડપે લગભગ ઉત્તર તરફ આગળ વધ્યો હતો અને ચક્રવાતી તોફાન 'બિપરજોય'માં ફેરવાઈ ગયો હતો.
સાંજે 5:30 વાગ્યે, તે ગોવાના પશ્ચિમ-દક્ષિણ પશ્ચિમમાં લગભગ 920 કિમી, મુંબઈથી 1050 કિમી દક્ષિણ-પશ્ચિમ, પોરબંદરથી 1130 કિમી દક્ષિણ-દક્ષિણ પશ્ચિમ અને કરાચીથી 1430 કિમી દક્ષિણે સ્થિત હતું.
IMD એ ટ્વિટર પર જણાવ્યું હતું કે ઉત્તરપૂર્વ અરબી સમુદ્ર અને ઉત્તર ગુજરાતના દરિયાકાંઠે પવનની ઝડપ 45-55 kmph થી 65 kmph સુધી પહોંચવાની સંભાવના છે. તેમણે માછીમારોને દરિયામાં ન જવા જણાવ્યું છે.
મુંબઈના પ્રાદેશિક હવામાન કેન્દ્ર (RMC)ના વડા સુનિલ કાંબલેએ જણાવ્યું હતું કે, “નીચા દબાણનો વિસ્તાર આપણા દરિયાકાંઠાથી 1,000-1,100 કિમી દૂર છે, તેથી આપણા કિનારા પર તેની અસર હાલમાં ઓછી છે. જેમ જેમ ચક્રવાત આગળ વધે છે તેમ તેમ તે ઉત્તર તરફ આગળ વધે તેવી શક્યતા છે અને તે સમયે આપણે આપણા દરિયાકાંઠે તેની અસર જોઈ શકીશું. તેમણે કહ્યું હતુ કે ઓછા દબાણના વિસ્તારને ધ્યાનમાં રાખીને માછીમારો અને શિપિંગ એજન્સીઓને એલર્ટ અને ચેતવણીઓ જારી કરવામાં આવી છે.
