રાજ્યભરમાં મેઘરાજાએ મન મૂકીને વરસ્યા બાદ બે ત્રણ દિવસથી વરસાદ ઓછા પ્રમાણમાં પડી રહ્યો છે. વાતાવરણમાં તો હજુ વરસાદી જ માહોલ જોવા મળી રહ્યો છે ત્યારે આ દરમિયાન હવામાન વિભાગની નવી આગાહી સામે આવી છે.
જેમાં કયા વિસ્તારમાં કેવો વરસાદ પડી શકે છે તેની માહિતી આપવામાં આવી છે, હવામાન વિભાગ દ્વારા આપવામાં આવેલી માહિતી પ્રમાણે આજે પણ રાજ્યમાં રેડ એલર્ટ, ઓરેન્જ અને યલો એલર્ટ આપવામાં આવ્યું છે.
હવામાન વિભાગના અમદાવાદ કેન્દ્રના મોસમ વૈજ્ઞાનિક રામાશ્રય યાદવના શનિવારે જણાવ્યા પ્રમાણે, દક્ષિણ ગુજરાત પર ઓફ શોર ટ્રફ બનેલું છે. આ સાથે જ 18 ડિગ્રી ઉત્તર અક્ષાંશ પર શિયર ઝોન પેટર્ન છે. જ્યારે ગુજરાત પર કોઇ સાયક્લોનિક સર્ક્યુલેશન નથી. ત્યારે બે દિવસ વરસાદનું જોર રહેશે ત્યાર પછી ધીમે ધીમે જોર ઘટશે. હવામાન વિભાગ દ્વારા શનિવારે જે આગાહી કરવામાં આવી છે તેમાં લગભગ જિલ્લામાં વરસાદની શક્યતાઓ વ્યક્ત કરવામાં આવી છે.
હવામાન વિભાગે આજ માટે જિલ્લા પ્રમાણે કરેલી આગાહીમાં વડોદરા, છોટા ઉદેપુરમાં રેડ એલર્ટ છે. જ્યાં ભારેથી અતિભારે વરસાદ પડી શકે છે. અમરેલી, ભાવનગર, બોટાદ, અમદાવાદ, આણંદ, ભરૂચ, નર્મદા, પંચમહાલ, દાહોદ, મહીસાગરમાં ઓરેન્જ એલર્ટ છે. જ્યાં અતિ ભારે વરસાદની સંભાવના છે. જ્યારે ગીર સોમનાથ, રાજકોટ, ખેડા, ગાંધીનગર, સાંબરકાંઠા, અરવલ્લી, સુરત, તાપી, ડાંગ, નવસારી અને વલસાડમાં યલો એલર્ટ છે.
આવતી કાલ સોમવારના દિવસે અમદાવાદ, આણંદ, વડોદરા, ભરૂચ, છોટા ઉદેપુરમાં ઓરેન્જ એલર્ટ છે. જ્યારે જામનગર, રાજકોટ, ભાવનગર, બોટાદ, સુરેન્દ્રનગર, મોરબી, નર્મદા, સુરત, તાપી, ડાંગ, નવસારી, વલસાડ, પંચમહાલ, દાહોદ, ખેડા, મહીસાગર, ગાંધીનગર, અરવલ્લી, સાબંરકાંઠા, બનાસકાંઠા, મહેસાણા, પાટણમાં યલો એલર્ટ છે.
મંગળવાર અને બુધવાર માટે હવામાન વિભાગે આગાહી આપતા જણાવ્યુ છે કે, નવસારી અને વલસાડમાં યલો એલર્ટ છે. જ્યારે રાજ્યના બાકી તમામ જિલ્લાઓમાં વરસાદનું એલર્ટ નથી
